Македонија домаќин на две Европски младински кошаркарски првенства во 2022
Бордот на ФИБА Европа ги прифати апликациите за организацијата на две младински првенства, по едно во машка и женска конкуренција.
Од 12 до 20 август 2022 година во Скопје ќе се одржи континенталното кадетско првенство од елитната дивизија (генерација на играчи родени 2006 година и помлади).
Македонија ќе ги пречека најдобрите кошаркари од Европа на оваа возраст откако две години по ред овој шампионат беше одложуван поради пандемијата на коронавирусот.
Во нашата земја ќе се игра и Европското првенство од „Б“ Дивизија „Под 20“ години во женска конкуренција и тоа во периодот од 9 до 17 јули.
Во останатите категории, машката селекција „Под 18“ години ќе се натпреварува на Европското првенство „Б“ Дивизија во Романија од 16 до 24 јули.
Европското првенство за кошаркари „Под 20“ години ќе се игра во Грузија, во периодот од 16 до 24 јули. Женската репрезентација „Под 16“ години ќе игра на Европското првенство „Б“ – дивизија во БиХ од 6 до 14 август, а две години постарите кошаркарки на Европското првенство „Б“ Дивизија во Австрија, од 24 јули до 1 август.