Лазаров: Веројатно ова ќе биде мојата последна сезона како ракометар! (ВИДЕО)
Француската национална телевизија, „Франс 3″ го посети почетокот на подготовки во корона-кризата на францускиот вицешампион Нант и направи репортажа за нашиот Кирил Лазаров. Французите посебно ги интересираше неговата најавена одлука дека ја игра последната сезона во професионалната кариера.
– Сменив многу земји, настапував во Хрватска, Унгарија, Шпанија, сега сум во Франција. Скоро дваесет години сум во странство. Многу ги користам масажите. и во Нант и во македонската репрезентација. Масерите се мои големи пријатели.
Одлучив во главата дека ова веројатно ќе биде моја последна сезона како ракометар. Но, ќе ја донесам дефинитивната одлука во јануари и февруари. Ако мојата глава рече дека е доста, тогаш доста е. Но, одлично се чувствувам и спремен сум – се зборовите на нашиот најдобар ракометар.
Доколку некој добро го познава Лазаров од сегашниот ростер на Нант, тоа се шпанските ракометари, со кои претходно играше во АСОБАЛ лигата, но и тренерот Алберто Ентрериос, со кого македонскиот ас ја делеше соблекувалната во Сиудад Реал (Атлетико Мадрид).
– Верувам дека Кире ќе има добра сезона и дека ќе биде константен во нападите, што не е лесно за 40-годишник – смета тренерот на Нант, Алберто Ентрериос.
Дури и најмладите членови на Нант земаат пример од нашиот капитен. Тимо Брие го апострофира професионализмот и примерот кој Лазаров им го покажува на помладите.
– Откако дојде Кирил е пример за нас. Пример на тренинзите, како се однесува, пример за време на оброците…Кире е класа, на теренот или надвор од него, Кире е пример – вели младиот Брие.
Новата сезона во Лигата на шампионите и француското првенство е на самиот старт, а Нант пак ќе биде еден од фаворитите во двете натпреварувања.