Повеќе нема дилеми за Барселона, размената со Јувентус ќе се реализира на првиот ден од летниот преоден рок. Артур ги прифати условите кои му ги понуди Јувентус и ќе има двојно поголема плата, така што Миралем Пјаниќ ќе биде првото засилување за Барселона.

Според договорот, за Барселона да биде „чиста“ пред УЕФА и финансискиот фер плеј, Јувентус прво ќе плати 70 милиони евра за Артур, а неколку дена подоцна, шпанскиот тим ќе врати 60 милиони евра во касата на „старата дама“ за трансферот на Пјаниќ.

Откако го решија прашањето со средниот ред, управата се фокусира на нападот, но се чини дека Лаутаро Мартинез е се подалеку од „Камп Ноу“.
Интер ги прифаќа понудените играчи како Артуро Видал и поради тоа инсистираат Барселона да ја плати откупната клаузула која изнесува 111 милиони евра.

Каталонците немаат толку средства и поради тоа се насочија кон други имиња, едно од нив е Пјер-Емерик Обамејанг од Арсенал.

Но, денеска во каталонските медиуми одекна вистинска бомба, Барселона седна на преговарачка маса со Единсон Кавани.

Уругваецот по завршување на сезоната е слободен играч, не сака да чуе за продолжување на договорот со ПСЖ и веќе почна да ги разгледува понудите.
Атлетико Мадрид и Интер пројавија сериозен интерес, но платата од 10 милиони евра годишно е преголем залак за двете екипи.

Но, откако во трката се вклучи и Барселона, Кавани му наложил на својот агент да седне на преговарачка маса и да се договори со каталонците, па дури е подготвен и да ги намали своите барања.