Членството на Република Северна Македонија во Алијансата обезбедува дополнителна рамка за соработка и солидарност во областа на одбраната, посочува новиот француски амбасадор во земјава Кристоф Ле Риголер во интервју за агенцијата МИА.

– Северна Македонија, која сега треба да ги исполни капацитетните цели што произлегуваат од обврските во НАТО, може да се потпре на своите односи со Франција и нејзината воена експертиза за модернизација на својата Армија, особено во рамки на Договорот за соработка во одбраната, потпишан на 14 октомври 2022 година. Набавката на системите „Мистрал“ е конкретен пример за силните врски меѓу нашите две земји – вели Ле Риголер.

На прашањето дали постои можност за француско посредување и во „француски предлог плус“, за уставни измени со одложено дејство до завршувањето на преговорите, амбасадорот вели дека за Франција,„интеграцијата на регионот е приоритет“ и затоа Париз е „подготвена да ја обезбеди сета своја помош за надминување на сегашните блокади“.

– Неопходно е да бидеме реални и да разбереме дека не може да постои апсолутна гаранција за исходот на процесот на интеграција, кој е по својата природа сложен, бидејќи бара согласност од сите членки. Франција, сепак, е подготвена да работи и да ја искористи својата моќ на убедување за да го осигура текот на процесот на интеграција, во корист на Европската Унија и на целиот Југоисточен регион на Европа – вели новиот француски амбасадор во земјава Кристоф Ле Риголер во интервју за агенцијата МИА.