Кремљ го потврди интервјуто на Такер Карлсон со рускиот претседател Путин
Контроверзниот американски новинар Такер Карлсон го интервјуирал рускиот претседател Владимир Путин, а информацијата која ја потврдија и од Кремљ, што предизвика бурни реакции на Западот.
Според бриселскиот портал Политико, Карлсон, кој неколку пати јавно ја доведуваше во прашање помошта од Западот за Украина, во вторникот вечерта ги објави плановите за интервју со рускиот претседател.
Видео најавата до вечерва ја погледнале повеќе од 85 милиони корисници на X платформата.
Why I'm interviewing Vladimir Putin. pic.twitter.com/hqvXUZqvHX
— Tucker Carlson (@TuckerCarlson) February 6, 2024
Во видео пораката, Карлсон изјавил дека го интервјуирал Путин „бидејќи тоа е работа на новинарите“.
„Ние сме новинари и наша должност е да ги информираме луѓето“, рече тој и додаде дека интервјуто ќе биде објавено „немонтирано“ на неговиот профил.
Тој додаде дека „ниту еден западен новинар не се потрудил да го интервјуира Владимир Путин, претседател на друга земја вклучена во овој конфликт“, и дека „повеќето Американци немаат поим зошто Путин ја нападна Украина или кои се неговите цели“.
Руските државни медиуми опширно ја пренесоа денешната посета на Карлсон.
Портпаролот на Кремљ, Дмитриј Песков денеска потврди дека интервјуто е веќе одржано, но не кажа ништо за тоа кога треба да биде објавено.
Сепак, објавата на Карлсон предизвика многу негативни реакции во САД, а американската новинарка и историчарка Ен Апелбаум на социјалната мрежа Икс напиша дека „Интервјуто на Карлсон е различно бидејќи тој не е новинар, тој е пропагандист“.
Иако е точно дека Карлсон ќе биде првиот американски новинар кој ќе го интервјуира Путин од почетокот на руската инвазија на Украина, многу западни новинари потсетија дека тоа не било затоа што не сакале.
Самиот Песков веќе потврди дека добиле многу барања од западни медиуми за интервју со рускиот претседател, но дека сите до еден биле одбиени бидејќи, според него, се „еднострани“ и непријателски настроени кон руската страна.
Карлсон доби дозвола бидејќи неговата позиција е различна, рече Песков.
„Тоа не е проруско, не е проукраинско, туку проамериканско. Ова е во целосна спротивност со ставот на повеќето традиционални англосаксонски медиуми“, објасни тој.
Западните новинари не се единствените кои изразија револт поради одлуката на Карлсон, туку тоа го направија и многу колеги во Русија.
Медиумските работници потсетија на репресијата на Путин врз руското и странското новинарство, која само се засили од почетокот на инвазијата на Украина во февруари 2022 година.
Најмалку 1.000 руски новинари ја напуштија земјата поради строгите закони за цензура кои го криминализираат критичкото известување за војната во Украина.
Асошиетед прес наведува дека западните новинари биле поканети на годишната прес-конференција на Путин, прва од почетокот на војната, но само на двајца им било дозволено да поставуваат прашања.