Фудбалската репрезентација на Германија со вчерашниот пораз на „Вембли“ од Англија заврши една ера, Јоаким Лев за последен пат ги предводеше „панцитите“ и по 15 години си заминува од националниот тим.

Неговиот наследник одамна е познат, тоа е довчерашниот тренер на Баерн Минхен, Ханси Флик кој според германските медиуми од септември ќе започне реконструкција во репрезентацијата.
Но, германскиот весник „Билд“ тврди дека Лев нема да биде единствениот кој ќе ја напушти репрезентацијата, истото ќе го сторат и дел од најискусните и најдобри фудбалери.

Според весникот, последниот натпревар го одигра и Тони Крос, кој беше незаменлив на средината на теренот и 11 години беше стандарден во првиот тим притоа одигрувајќи 106 натпревари на кои постигна 17 гола. Иако е релативно млад и има 31 година, Крос одлучил дека е време да се повлече и местото да им го отстапи на помладите.
Исто така извесно е дека последниот натпревар за германската репрезентација го одиграа и Томас Милер и Мануел Ноер. Милер има 106 настапи и 39 гола, додека Ноер на 104 натпревари го бранеше голот на својата репрезентација.