КОСОВЦИТЕ ГО НАЛУТИЈА РАМА: Сите патници во Албанија мора да плаќаат патарина
Барањата на поединци од Приштина да се укине плаќањето на патарина на националниот пат кон Тирана го налутиле албанскиот премиер Еди Рама. Според пишувањата на „Газета експрес“, Рама побарал од шефот на Министерството за надворешни работи во заминување, Беџет Пацоли, да им објасни дека тоа не е возможно.
Дополнително, албанскиот премиер реагирал и за преселувањето на загрозените албански граѓани на Косово.
– Тие мора да останат близу до своите домови и работни места – констатирал Рама.
Како што пренесува косовска „Газета“, Рама при посетата на Драч и Тумане, места кои се најпогодени од завчерашниот разорен земјотрес, се сретнал со Пацоли и му рекол да ги предупреди Косоварите кои донираат помош за Албанија да не бараат укинување на патарината на националниот пат.
– Патарината е обврска на сите и е наменета за инфраструктурата, која треба да обезбеди безбедност на патиштата и во земјата – констатирал Рама.