Кина се бори со падот на наталитетот, Сечуан им дозволува на невенчаните да имаат деца
Здравствените власти во кинеската југозападна провинција Сечуан ќе им дозволат на невенчаните лица да основаат семејства и да уживаат во придобивките на брачните двојки, во најновиот обид да се запре падот на наталитетот.
Според законот, во Кина им е дозволено да раѓаат само на мажените жени, но со оглед на тоа што браковите и стапката на наталитет паднаа на рекордно ниско ниво во последниве години, провинциските власти го изменија правилото од 2019 година за да ги вклучи самците кои сакаат да имаат деца.
Брачните парови и сите поединци кои сакаат потомство ќе можат да се регистрираат во петтата најнаселена кинеска провинција од 15 февруари, без ограничување на бројот на деца. Целта на мерката е „да се промовира долгорочен и рамномерен развој на населението“, објави здравствената комисија во Сечуан на својата веб-страница.
Досега Комисијата тоа им го дозволуваше само на брачните парови кои сакаа да имаат до две деца.
Населението на Кина се намали минатата година за прв пат по шест децении, што е историски пресврт, а се очекува падот да продолжи. Оваа можност ги принудува властите да воведат стимулации и мерки за зголемување на населението.
Националниот систем на регистрирање парови кај локалните власти обезбедува породилно осигурување кое ги покрива медицинските сметки и им овозможува на мажените жени да ја задржат својата плата за време на породилното отсуство. Овие бенефиции сега ќе се прошират на невенчаните жени и мажи во Сечуан, кој е на седмото место во земјата по бројот на постари од 60 години, покажуваат владините податоци.