Кастратовиќ: И ние имаме што да кажеме во оваа група
Екипата на Металург ги дозна противниците кои го очекуваат во групната фаза во Лигата на Европа и меѓу нив е поранешниот германски шампион Рајн Некар Левен. Иако нема лесни противници, во Металург се задоволни од изборот на противниците. Покрај Металург во групата А се наоѓаат уште и Адемар Леон, Висла Плоцк, Чеховски Медведи, Тулуз и Фиверс од Австрија.
Тренерот Зоран Кастратовиќ е претпазлив во најавите, но и убеден дека во оваа група Металург ќе има што да каже.
– Генерално, во оваа фаза од натпреварувањето нема слаби екипи и не очекуваат тешки натпревари. Дури четири од шесте екипи во групата, вклучувајќи го и Металург, имаат солидно искуство од настапи во Лигата на шампионите, а на некои од нив веројатно и сега им е местото таму. Сепак, сметам дека имаме противници со кои ќе можеме да се натпреваруваме и ќе имаме што да кажеме на тие средби. Многу е важно сега да го искористиме времето и да ја подигнеме формата. Мислам дека ќе успееме во тоа и ќе се претставиме во многу подобро издание од досегашното– изјави Кастратовиќ за официјалниот сајт на РК Металург.