Игор Ѓорѓиев и во новата сезона ќе биде капитен на ракометниот клуб Алкалоид. На стартот на подготовките, средниот бек ги изнесе своите очекувања за натпреварите кои следат и најави максимална борба и ангажираност на секој меч.

– Нѐ очекува подготвителен период, во кој првата недела ќе бидеме во Скопје, а потоа ќе заминеме во Маврово. Ќе гледаме да се спремиме најдобро на физички план, исто така и психички да се држиме како тим и да изградиме една хемија. Целиме од старт добро да ги вклопиме новите играчи во нашиот систем. Ние како тим имаме свои предизвици и цели, прво сакаме подготовките да ги минеме во најдобар ред и сите да сме здрави. А, потоа, се знае, на секој меч одиме на победа – вели Ѓорѓиев.

За настапот во Европската лига на ЕХФ:

– По освоениот трофеј во Европскиот куп ни следи нов предизвик, тоа е настап во квалификациите на Европската лига на ЕХФ каде имавме незгодна ждрепка и за ривал добивме тим од Бундеслигата. Но, нашиот менталитет во Алкалоид е секогаш да одиме на победа. Ние ќе го дадеме нашето најдобро, па се надеваме на најдобар епилог – рече Ѓорѓиев.

И за првенството на Македонија:

– Во првенството на Македонија ќе биде исто така интересно, лигата е засилена и изедначена. Има четири тима кои се издвојуваат на врвот, ние сме еден од нив, но и другите нема да ги потценуваме. Наше е да се бориме на секој меч, да бидеме максимално фокусирани и ангажирани и да ги следиме и слушаме советите на нашиот тренер, со цел да дојдеме до што е можно подобри резултати – се зборовите на Ѓорѓиев.

РК Алкалоид ги започна подготовките за новата сезона, нов играч е Исланѓанецот Улфар Пал Монси Тордарсон