Во Кипар започна судењето на петмина Израелци обвинети за групно силување на 20-годишна Британка минатиот месец.

Нападот, според обвинението, се случил во хотел во Аја Напа, популарно туристичко место. Судницата во Фамагуста, северно од Аја Напа, била исполнета со роднини на обвинетите кои се појавиле како поддршка.

Сите обвинети се на 19 или 20 години и потекнуваат од израелскиот арапски град Мајд ал-Крумах. Сите ги негираат обвинувањата. Нивните адвокати на денешното рочиште се пожалиле дека се уште не ги виделе клучните докази, меѓу кои и извештајот од ДНК анализата.

Еден од нив тврдел дека извештајот може да покаже дека неговите двајца клиенти не биле во собата за време на наводниот напад на 3 септември. Државниот обвинител рече дека извештајот за ДНК ќе биде готов до крајот на денот.

По прекинувањето на дискусијата, семејствата на обвинетите притрчале да ги гушнат, а едно од лицата видно плачејќи ја прегрнало својата мајка. Поранешната кипарска парламентарка Скеви Кукума, исто така, присуствувала на сослушувањето со членовите на водечкото женско движење Пого.

Кукума рече дека тие се таму за да испратат порака дека „жртвите треба да чувствуваат дека можат да зборуваат и дека може да им се верува“. „Тие не се сами“, додаде таа. Судењето продолжува на 16 октомври.

Израелското Министерство за надворешни работи првично соопштило дека за наводниот напад биле уапсени шестмина граѓани.