Галеријата „Метаноја“, во соработка со „Балканскиот институт за вера и култура“, го најави отворањето на изложбата „Патина на љубовта“ на скулпторот Синиша Новески, што ќе се одржи на 15 февруари (четврток), од 19 часот, на ул. „Максим Горки“ бр. 19 во Скопје. Изложбата ќе трае до 6 март оваа година.

На отворањето на изложбата ќе се обратат рецензентот д-р Коста Милков, директорката на галеријата „Метаноја“, м-р Нада Милкова, и авторот на делата Синиша Новески.

– Скулпторот Синиша Новески со овој избор на дела за изложбата „Патина на љубовта“ зборува со уметнички јазик за животот и за љубовта, како главен двигател. Соочувајќи се со неговите четиринаесет скулптури и „исчитувајќи“ го поттекстот на творештвото на Новески може да се заклучи дека тој го разбира животот како „патина на љубовта“, а неговиот уметнички израз е посветен на „претставување“ и толкување на ова најголемо животно „таинство“ – истакнува рецензентот д-р Коста Милков.