Во организација на НУЦК „Браќа Миладиновци“ во Струга до 13 јули е поставена изложбата со наслов „Тоа е што е“ со петнаесетина графики од младата графичарка Ана Трајковска.

Изложбата е сместена во локалот „На Струга Дуќан“ во Чаршијата во Струга. Станува збор за петто самостојно претставување на авторката. Проектот е поддржан од Министерството за култура.

Aна Трајковска е родена 1995 година во Скопје. Таа е дипломиран графичар во класата на проф. м-р. Зоран Јакимовски, отсек графика со модул конзервација и реставрација. Магистрирала на истиот факултет во 2021 г. кај проф. Зоран Јакимовски, смер графика.

Главно е насочена кон графиката како медиум и различните можности кои може да ги даде. Експериментирајќи се обидува да пронајде нов начин на визуелно комуницирање применувајќи ја оваа техника и интегрирајќи ја со други медиуми и визуелни форми, истовремено трагајќи по начини да ја оддалечи од нејзиното традиционално восприемање.

Досега има освоено награда од ДЛУМ за изложбата „Нови енергии“ во 2021 година, а добитник е и на награда за најдобра графика од Агенцијата за млади и спорт на РСМ.