Меди Милер била само обична тинејџерка од Дулут во Минесота, пораснала во американско семејство од средна класа, се додека во тинејџерскиот период не се сретнала со дрогата и алкохолот. Нејзиниот живот, но и животот на нејзиното семејство, се претвори во пекол.

– Тинејџерите експериментираат со дрогата и алкохолот. Се чини дека тоа е „нормална“ фаза за многумина. Меѓутоа, тоа за мене беше опасна фаза. Некои можеа да се сопрат, а јас бев опседната. Прв пат во животот се почувствував самоуверено. Одеднаш не ме интересираше што другите мислат за мене. Започнав да губам килограми и самодовербата нагло порасна – ја започна приказната Меди за еден американски сајт на кој се објавуваат животни исповеди од обичните луѓе.

Како што вели, кога имала шеснаесет години, потребата за бегство станала нејзин приоритет. Во тоа време била во врска со постаро момче, а тоа нејзините родители не го одобрувале.

– Моите родители мислеа дека тој е оној кој ми ги дава таблетите против болки на кои бев навлечена. Бараа судска забрана за него. Поради тоа го засакав уште повеќе. Во текот на една кавга со мајка ми, одлучив да си заминам. Како од нејзината уста излегуваа зборовите „Немој да се дружиш со Ник“, пукнав. Ја нападнав. Сестра ми ме фрли на земја додека повикаа полиција. Ми ставија лисици и ме сместија на задното седиште. Се обидував да го скршам прозорот шутирајќи го. Бесот го презема моето тело. Завршив во притвор за малолетници. Беше застрашувачки. Не припаѓав таму. Бев пуштена неколку недели подоцна и примена во својот прв центар за лекување – наведе таа.

До 17-та година, кога го завршила средното училиште таа веќе била зависник од Оксикодон, опиоиден аналгетик кој се користи за ублажување на болките.

– Родителите организираа забава за мене по повод завршувањето на средното училиште и тие неколку илјади долари кои ги добив ги потрошив исклучиво на таблети. Додека повеќето деца се подготвуваа за на колеџ, јас се обидував да смислам како да најдам пари за дрога. Моите стари пријатели од детството се дистанцираа. Моето семејство се грижеше, гледаа како моето тело откажува.

Родителите ја исфлиле кога виделе дека краде. Постарата сстра и дозволила да остане со неа и нејзиниот цимер. Таму ги поминала наредните пет години. Цело време се дрогирала со таблетите, а преминала и на хероин.

– Центрите за лекување беа моето бегство. Бегав од хаосот кој го создадов во рехабилитацијата. Се претварав дека сум подготвена да се променам. Никогаш тоа не траеше. Сонував само шприцот да ми влезе во вената. Опсесијата создаде чудовиште од мене. Не бев повеќе млада зрела личност пред која е животот. Бев наркоман кој чекаше да умре. Сестра ми еден ден ми рече: „Избрав песни за твојот погреб“, пишува Меди.

Едно случување од 2015 година направил пресврт во нејзиниот живот.

– Во август 2015 година го возев камионот на дедо ми. Додека го возев, очите почнаа да ми се вкрстуваат. Удрив во некој џип. Ербегот ме разбуди. Започнав да паничам. Додека другиот возач повикуваше полиција, јас излегов од камионот и започнав да трчам кон бензинската пумпа. Бегав од лекување а бев толку „средена“ што едвај ги држев очите отворени. Тоа беше крајот. Не можев повеќе да бегам. Седнав на работ од патот и чекав полиција. Имав разработени идеи како да се извлечам од ситуацијата во која се вметнав. Полицаецот кој ми ја напиша казната ми кажа „Вратете се на лекување што поскоро“, наведува Меди.

Од тој ден, 6 септември Меди е целосно „чиста“.

– Родив прекрасно момче на 25 април 2017 година. Мојот живот повеќе не беше само мој за да го уништувам. Сега имам одговорност. Имам дете кое целосно зависи од мене. Ме спаси. Тој е причината за се во мојот живот. Ми покажа што е љубов. Ме научи како да се сакам себе. Ме учи да растам, раскажа таа.