Инфицирани преку семејни контакти: Три медицински сестри на ГАК се позитивни, доктор и директорката во самоизолација
Три медицински сестри од Универзитетската клиника за гинекологија и акушерство се позитивни на ковид-19. Се заразиле преку семеен контакт, а двајца доктори меѓу кои директорката на Клиниката, Викторија Јовановска се наоѓаат во самоизолација поради заболени членови во нивните семејства.
Веста ја потврди и директорката Јовановска, според која трите медицинските сестри се заразиле со контакт од надвор, односно семеен контакт, а не на Клиниката.
– Ние двајцата доктори сме во самоизолација, не сме со решение, туку сме во самоизолација поради тоа што во семејствата имаме повеќе од тројца заболени. Се тестиравме и јас и докторот сме негативни. Мајка ми, сестра ми и внучето ми се позитивни и уште две внучиња од сестра ми се позитивни. Јас не сум имала контакт со медицинските сестри. И членови на семејството на лекарот, исто така, се позитивни. Поради тоа сме во самоизолација, посочи Јовановска.
Додаде дека на Клиниката сите ги почитуваат протоколите за носење лична заштитна опрема.
– Во овие седум месеци никој не се заразил на Клиниката. Нема никаква опасност да се заразат пациенти и персонал. Од понеделник уште еднаш ќе се тестираме, да имаме негативен тест и ќе одиме на работа, додаде Јовановска.