Индија го оцени документарецот на „Би-Би-Си” за Моди како „пропаганден”
Индиското Министерство за надворешни работи во четвртокот го отфрли документарниот филм на Би-Би-Си за премиерот Нарендра Моди во кој се доведува во прашање неговото раководство за време на немирите во Гуџарат во 2002 година како „пропаганда“.
Моди бил главен министер на западната држава Гуџарат кога била зафатена од немири во кои загинале повеќе од 1.000 луѓе – повеќето од нив муслимани. Насилството избувнало откако воз со хинду аџии се запалил, при што загинале 59, потсетува Ројтерс.
Обвинет дека не ги спречил немирите, Моди ги негираше обвинувањата и беше ослободен во 2012 година по истрагата на највисокиот суд на Индија. Друга петиција со која се доведува во прашање неговото ослободување беше отфрлена минатата година.
Огласувајќи го документарецот на Би-Би-Си како „пропаганда“ со цел да поттикне „дискрредитиран наратив“, портпаролот на Министерството за надворешни работи, Ариндам Багчи, рече дека во него е „еклатантно видлива“ „пристрасност“, „необјективност“ и „продолжување на колонијалниот начин на размислување“.