Бојкотот на наставата од прво до деветто одделение во основното училиште „Лазо Ангеловски“ во скопската населба Ново Лисиче продолжува и утре – ваква одлука е донесена на состанокот на Советот на родители, кој се одржа вечерва.

Родителите не ги пуштаат децата на настава поради ученик од трето одделение со насилно поведение, а според нив, бојкотот ќе продолжи „до институционално разрешување“ на ситуацијата.

Бојкотираат и учениците од ОУ „11 Октомври“, каде требаше да биде префрлен проблематичниот ученик, а директорката тврдеше дека дала согласност за негов упис по редовна постапка, ама се пишманила, затоа што добила информации за историјата на детето кои не ѝ биле претходно познати.

Родителите на учениците од „Лазо Ангеловски“ велат дека проблемот има генеза, историја и дека се незадоволни од работата на Центарот за социјални работи, од педагошката служба и поранешните обиди проблемот да се турка под тепих сè додека не ескалирал до степен повеќе да не може да се замижува пред него.

Денеска МОН извести дека е формирана интердисциплинарна комисија во врска со случајот, која ќе треба да го разгледа и да донесе мерки коишто ќе бидат во интерес и на ученикот и на сите инволвирани страни.

– Министерството за образование и наука учествува во изнаоѓањето решение за случајот со ученикот со кој јавноста е веќе запознаена и во таа насока, на иницијатива на МОН е формирана интердисциплинарна комисија составена од претставници на министерството, Бирото за развој на образованието, општината, училиштето и социјалните служби, која се состанува за разгледување и преземање соодветно мерки и активности согласно законската регулатива, во чиј фокус се најдобрите интереси на ученикот, но и на сите инволвирани, велат од МОН.

ФОТО | „Малиот тука ќе учи!“: Осамна транспарент во училиштето „Лазо Ангеловски“, кое зјае празно