Холандскиот дипломат Рон ван Дартел, кој пред само три недели беше именуван за специјален претставник кој ќе го промовира холандското учество во обновата на Украина, поднесе оставка откако пред неколку дена изјавил дека „Украинците се Руси“.

Ван Дартел, кој е поранешен холандски амбасадор во Србија, Полска и Русија, поднесе оставка поради коментарите што му ги кажал на авторот на една нова книга, уште пред да биде назначен на новата функција, пренесува „РТЛ“.

– Украинците исто така се Руси. Тоа не смееме да го заборавиме. Тоа е реалноста, рекол холандскиот дипломат.

Министерство за надворешни работи соопшти дека ја прифатило неговата оставка.

Холандското МНР соопшти дека изјавата на дипломатот била дадена пред неговото назначување месецов, но била објавена дури откако тој ја презел функцијата.

Ван Дартел „сфати дека повеќе не може да функционира веродостојно со дадените изјави и затоа реши веднаш да поднесе оставка“, соопшти холандското МНР.