Партиите треба да бидат претпазливи особено за економските закони, бидејќи бизнисот чека помош како неопходна потреба за државата и нејзината економија, вели во изјава за „Слободен печат“, Неби Хоџа – претседател на Стопанската комора на северозападна Македонија (СКСЗМ), коментирајќи ги најновите политички случувања во земјата, како и блокирањето на работата на Собранието од страна на пратениците со амандмани.

– Партиите мора да размислат за реалната состојба што ја зафати земјата, каде што економијата е оштетена на значително ниво, додека во последните денови гледаме зголемување на бројот на нови заразени од ковид-19, поради што беше воведен полициски час. Ние сме во многу кревок период од аспект на економијата и бизнисот, приложувајќи го тука и пописот кој е во тек – вели Хоџа.

Според него, политичките интервенции и случувања не треба да бидат до степен колатералната штета да е толку голема и целата економија да е лишена од државна помош.

-И пописот не треба да биде изложен на ризик, бидејќи истиот процес го баравме многу години и тоа е важен процес за државата, бидејќи ја покажува фактичката демократска состојба во земјата како еден од главните столбови за економската статистика на секоја модерна држава – нагласува Хоџа.