Хамас вечерва ослободи две жени од Израел кои ги држеше како заложници
Две повозрасни жени од Израел се новите ослободени заложници, кои досега ги држеше милитантната група Хамас, објави Ројтерс. Ова доаѓа по вложените напори за медијација на Катар и Египет. Абу Убаида, портпарол на вооруженото крило на Хамас, на Телеграм изјавил дека го осигурал ослободувањето на заложниците и покрај ,,тоа што непријателот одбиваше да ги прифати од минатиот петок како и негрижата на непријателот за нашите затвореници”.
Одлучивме да ги ослободиме од хуманитарни причини и поради нивното лошо здравје. И покрај тоа, непријателот не прифати да ги земе минатиот петок, се вели во соопштението.
Вооруженото крило на Хамас минатиот петок ослободи две Американки, две недели откако вооружени сили на Хамас ги киднапираа заедно со други лица во Газа на 7 октомври. Тогаш Хамас уби 1400 луѓе и зема околу 200 во заложништво.
Портпаролот на министерството за надворешни работи на Катар во петокот рече дека ослободувањето на двете жени со американско државјанство од Газа, дошло после повеќедневна континуирана комуникација со сите страни.
Вечерва Гардијан објави дека на повидок е ослободување на вкупно 50 заложници од страна на Хамас.