13 C
Скопје

Градење ќе има, дали ќе има и усул?

Дали во кругот на поранешната фабрика „Треска“ треба да се направи парк или да се изградат еден куп нови згради „наполитанки“? Треба ли да се подигнат кулите кај „Холидеј ин“ и да се урбанизира просторот со нови станови, деловни простории и дуќани, како што сакаат новомаалци или да се направи парк? Ѝ требаат ли на населбата Расадник 100 згради? На Јурија во Ѓорче Петров седумнаесеткатница? Мора ли да никнат нови згради во Хром, во Аеродром, насекаде низ Скопје? Мора ли, треба ли, дали?

Неодамна премиерот Зоран Заев во врска со случувањата и реакциите околу изградбата на висококатниците на паркингот кај „Холидеј ин“ рече дека Скопје треба да продолжи да се гради, но со усул, и дека мегаломанските проекти треба да бидат скратени, скротени и нормализирани во согласност со законите за урбанистичко планирање и за градење. Всушност, градењето со мерка во Скопје било и нивно предизборно ветување.

За жал, во градов, во последниве неколку децении локалните власти не знаат за усул. Се донесоа детални урбанистички планови во кои се вцртаа згради на секој слободен метар земја, на местото на секоја стара куќа, врз згради од два ката се надградија уште пет, се пикнаа објекти еден до друг за станарите да си дишат во врат, да си подадат кафе преку терасите и да си ѕиркаат в постела.

Сопствениците на парцелите и градежниците тријат раце, на локалните власти им се полнат касите од комуналии. Само граѓаните во очај „врескаат“ барајќи нормален живот, зеленило, соодветна инфраструктура и проток на воздух. Нив нема кој да ги чуе, затоа што ДУП се чини дека е на ниво на Устав, а сопственичките права се неприкосновени. И затоа што досега не понел одговорност никој што кренал два прста и гласал за план што е надвор од секакво хумано живеење. Без оглед на штетата што е направена.

Деновиве Антикорупциска комисија побара од Јавното обвинителство да преземе истражни дејства и да обезбеди докази во однос на реализацијата на ДУП „Голем ринг” јужен дел исток, каде припаѓа и просторот кај „Холидеј ин“. Иницијативата се однесува на градоначалниците Владимир Тодоровиќ и Андреј Жерновски, на неколку раководители на сектори, но и на планерите од „Билт“ и е покрената затоа што се претпоставува дека во постапката за изменување и дополнување на ДУП Голем ринг за 2012 – 2017 година тие ја злоупотребиле својата службена положба и ги пречекориле границите на службеното овластување постапувајќи спротивно на законот и со тоа прибавиле имотна корист за сопствениците на градежната парцела 1.1.

Дали конечно ќе се случи чудо и некој ќе понесе одговорност за планот? И за тоа како е донесен и за тоа зошто толку години отпосле не е усогласен со Генералниот урбанистички план? Ако тоа се случи веројатно ќе биде поука за сите кои во иднина ќе бидат вклучени во донесување на било кој ДУП. И тогаш дури ќе може да се зборува за градење со усул.

Во меѓувреме, градежниците се пожалија дека им се скусува работата, дека трпат загуби, но предупредија и дека цените на становите ќе растат. Поскапеле материјалите за градба, но и луѓето увиделе дека е многу исплатливо да се инвестира во недвижности.

Инвестиции во време на корона. За хуманиот живот, ќе почекаме.

Поврзани вести

Успорената демографија нема да ја сопре Кина

Гидеон Рахман/Financial Times

Балканците не се пасивно мнозинство и сакаат во НАТО!

Алмир Бичакчиќ/ Ослобоѓење

Македонија има и втор олимпиец, Дејан Георгиевски обезбеди норма за ОИ во Токио

Слободен печат

План за финансирање на забрзан економски раст: 5%стапки на раст на БДП, нови инвестиции и стабилен јавен долг

Фатмир Бесими

Еколошки остров: Вештачко островско одморалиште ќе се гради од пластичен отпад собран од океанот

Слободен печат

Зошто земјите кои му дозволуваат на вирусот да дивее можат да го загрозат целиот свет?

Слободен печат

Остави Коментар