ФОТО | Саудиска Арабија за првпат учествува на изборот за Мис Универзум: Ќе ja претставува 27-годишна инфлуенсерка и стоматолог
Оваа година Саудиска Арабија за првпат во историјата ќе учествува на изборот за Мис Универзум. Земјата ќе ја претставува Руми Алкахтани, 27-годишна инфлуенсерка и стоматолог, родена во Ријад, пренесува „Индепендент“.
„Чест е да се учествува на изборот за Мис Универзум 2024. Ова е прво учество на Кралството Саудиска Арабија на изборот за Мис Универзум“, објави таа на својот инстаграм-профил.
Освен што е крунисана за Мис Саудиска Арабија, Алкахтани ги носи титулите Мис на Блискиот Исток, Мис на Арапскиот свет за мир 2021 година и Мис жена. Претходно, таа веќе ја претставуваше својата земја на неколку меѓународни натпревари како Мис Азија и Мис на Европа. Дипломирала стоматологија и зборува три јазици – англиски, француски и арапски.
Изборот годинава ќе се одржи во Мексико, а за првпат ќе учествува и Иран. Минатата година исто така беше „историска“ за Мис Универзум, кога Лујане Јакуб го претставуваше Бахреин и стана првата жена од регионот на Персискиот Залив што го стори тоа.
На минатогодишниот избор за Мис Универзум учествуваа и две трансродови жени и „плус сајз“ моделот Џејн Дипика од Непал, која стигна до полуфиналето. Претходниот избор беше посебен и поради првата победа на Никарагва, односно на претставничката Шејнис Паласиос.
Инаку, престолонаследникот Мохамед бин Салман Ал Сауд стои зад неодамнешните социјални и економски реформи во Саудиска Арабија. На жените им е дозволено да возат, можат да добијат пасош без одобрение од машки старател и им е дозволено да присуствуваат на јавни спортски настани и концерти.