Конвојот на руската војска се доближил околу пет километри до Киев во последните 24 часа, а сега руските трупи се на само 15 километри од центарот на главниот град, изјави за Би-Би-Си неименуван претставник на американската одбрана.

Новите сателитски снимки од четвртокот покажуваат дека рускиот „конвој на смртта“, како што го опишува „Дејли мејл“, кој последен пат е виден северозападно од Киев во близина на аеродромот Антонов, во голема мера се прегрупирал на помали делови.

Снимките од американската компанија „Максер Технолоџи“ покажуваат дека тенковите биле распоредени во градовите во близина на аеродромот, северно од Киев, и дека некои возила преминале во блиските шуми, со хаубици подготвени да отворат оган. Конвојот беше формиран на почетокот на минатата недела кон Киев, но неговиот напредок запре, најверојатно поради недостигот на гориво и храна, но и поради украинскиот отпор.

„Киев се претвори во тврдина“

„Дејли мејл“ пишува дека битката за Киев „влезе во рана фаза“ и дека е извесно дека ќе биде „долга и крвава“. Повикувајќи се на украинските команданти, весникот наведува дека силите на рускиот претседател Владимир Путин напаѓаат северно, западно и источно од Киев.

Украина верува дека нејзиниот главен град, дом на околу три милиони луѓе, наскоро ќе биде опколен, по што Киев би можел да се соочи со слична судбина што го снајде Мариупол, кој 11 дена е под опсада, оставен без вода, греење и струја.

Украинските единици за територијална одбрана задолжени за одбрана на градот беа снимени како копаат канали и поставуваат барикади, а градоначалникот на Киев Виталиј Кличко рече дека главниот град се претворил во „тврдина“ која ја бранат вооружени цивили, додека половина од населението го напуштило градот поради конфликтот.

-Главната цел на Русите е да го заземат Киев, да го опколат, а потоа да нападнат и да ја соборат владата. Нивните планови не се реализираат, благодарение на нашите момци во Буча, Ворзел, Ирпин и Гостомел, каде што се водат жестоки битки. Нашите момци ги попречуваат сите планови за опкружување на Киев – рече Кличко во четвртокот вечерта во видео обраќањето.

– Според последните проценки, секој друг граѓанин на Киев си замина – додаде тој.

Агенцијата за миграција на ОН во петокот соопшти дека вкупно 2,5 милиони луѓе ја напуштиле Украина до 11-ти март.

Кличко рече дека комуналните служби во градот се уште работат.

-Главниот град е топол, имаме вода, светилки и интернет. Повеќето аптеки и продавници се отворени. Градот обезбедува превоз на патници. Спасувачите чекаат луѓе на железничката станица. А оние кои сакаат да го напуштат Киев се испраќаат со возови на запад од Украина – изјави Кличко, поранешен професионален боксер, додавајќи дека „луѓето ќе станат“ и дека „непријателот нема да помине“.

Што значи распоредувањето на рускиот конвој?

Прашањето во врска со конвојот беше дали, како што тврдеа западните аналитичари, посочувајќи дека се очекува напад врз Киев, тој „запрел“ или се прегрупирал за да заземе позиции и да го опколи главниот град на Украина, пишува во анализата за „Гардијан“ Питер Бомонт кој е во Лавов.

Со оглед на тоа што оклопните единици се забележани во градовите во близина на аеродромот Антонов во Гостомел, северно од Киев, и возилата кои влегуваат во шумата со хаубици се подготвени да отворат оган, руските сили се поверојатно ќе постават опсада на двете страни на реката Днепар, рече Бомонт.

Но, како што истакна, се’ уште не е јасно дали Русите сакаат да го затворат обрачот околу Киев на југ или да го остават тој излез отворен. Бомонт рече дека поинтензивното бомбардирање на Киев ќе биде во согласност со неодамнешната руска тактика околу Мариупол и Харков.

Иако руската војска може да ја смета опсадата за помалку ризична опција, со оглед на ефективноста на отпорот на Украина, таа не е без ризици. Според Бомонт, Украинците ефикасно користеле борбени дронови од Турција, а руските позиции окупирани надвор од градот за гранатирање би биле ранливи на напади, вклучително и од беспилотни летала.

Жителите решени да го бранат главниот град

Жителите на Киев, решени да го одбранат својот град, ископале ровови кои водат длабоко во шумата што го опкружува автопатот што од југ води до главниот град.

Укрепените резервни позиции се подготвени, а по патот во редовни интервали се поставуваат огромни метални противтенковски барикади познати како „ежови“. На секој излез има импровизирани блокови направени од вреќи со песок и огромни бетонски блокови. Во одбраната има доброволци, од кои некои се вооружени со автоматски пушки и големи ножеви, наведува Си-Ен-Ен.

Олексиј Гончаренко, волонтер на една од одбранбените позиции во Киев, изјави за Си-Ен-Ен дека работи во четиричасовни смени на контролниот пункт.

– Добро е. Едноставно е ладно. Жителите ни даваат супа и такви работи – рече тој.

„Нема да бидете сами“

Речиси 40.000 доброволци им се придружиле на територијалните одбранбени сили на Украина во првите два дена од инвазијата, изјави началникот на Генералштабот на украинските вооружени сили. Само во Киев 18.000 цивили земаа оружје кога властите ги повикаа доброволците и резервистите да им се придружат.

Си-Ен-Ен наведува дека „толку се пријавиле што морале да ги одбијат“, па помагаат на други начини. Прават молотови коктели, камуфлираат барикади, делат храна и пијалоци на стражарите и собираат пари за војската, градат блокади и бојат сообраќајни знаци за да ги збунат непријателските сили.

– Се обидуваме да се подготвиме за најлошото сценарио во кое би биле опколени од руски војници, а сите залихи би биле уништени. Затоа, се трудиме да ги направиме сите луѓе и секоја зграда подготвени за тоа – изјави Олексиј Еринчак, сопственик на книжарница во центарот на Киев, која сега е центар за волонтери.

– Ако се е блокирано, без интернет, телефон, ќе бидете заедно со соседите и тие можат да ви помогнат, нема да бидете сами – истакна тој.

Си-Ен-Ен наведува дека познатиот плоштад Мајдан во срцето на Киев сега е „тврдина“. Над плоштадот, местото на протестот во 2014 година, се вее украинското знаме.

Градските паркови сега се место за воени возила, додека бутиците, кафулињата и рестораните се опкружени со бариери. Електронскиот знак, кој инаку дава информации за сообраќајот, сега повикува „НАТО да го затвори небото“ или гласи: „Слава на Украина“. Еден од знаците гласи: „Станете руски војници. Како можете да ги погледнете своите деца во очи. Одете дома и бидете луѓе“.