Во големата сала на Филхармонија синоќа славенички концерт одржа нашето познато блузерско дуо Игор Џамбазов и Игор Атанасовски – Харе.

Пред „одбраната публика“ како што ја нарече на почетокот Џамбазов, се свиреа познатите хитови како „Да си жив и здрав“, „Диши длабоко“, “Труба“ и многу други, кои веќе три децении заедно ги свират Џамбаз и Харе.

Концертот беше прослава на два јубилеи, нивната соработка која трае веќе 30 гдини и 60-тиот роденден на Џамбазов, кој пак концертот го посвети на неговиот татко, маестро Александар Џамбазов, кој почина минатата година.

Иако пред почетокот Игор во негов стил ѝ се извини на Филхармонија за сè лошо што ќе чуе вечерта, сепак сè што можеше да се чуе, беше добар блуз отсвирен од врвни професионалци.

Вистинско уживање за вистинките познавачи и љубители на добар и квалитетен македонски блуз. Џамбазов и Харе уште еднаш потврдија дека остануваат најверните и најхрабри борци против кичот, шундот, турбофолкот и плејбекот.