ФОТО | Инспириран од Мадона: Македонскиот дизајнер Златко Јовановски креираше корсет за мексиканската ѕвезда Талија
Македонскиот дизајнер Златко Јовановски повторно осмисли креација на најголемата мексиканска ѕвезда Талија, која на македонската јавност ѝ е позната по теленовелата „Росалинда“ („Rosalinda“).
Талија синоќа присуствуваше на концерт на Мадона во Њујорк, САД и се појави во модно издание инспирирано од кралицата на поп-музиката, а со потпис на нашиот дизајнер.
Имено, Јовановски ѝ дизајнираше впечатлив корсет во златна боја, кој само ја надополни успешната трансформација на Талија, која сакаше да потсетува на Мадона од осумдесеттите години.
„Како девица“, напиша Талија во описот на фотографиите кои ги објави на Инстаграм, алудирајќи на големиот хит на Мадона – „Like a Virgin“ од 1984 година.
Потоа ѕвездата на мексиканските теленовели сподели и видео на својот инстаграм-профил, на кое покажа како изгледал целиот процес на трансформација.
„Погледнете како се подготвував за концертот на Мадона. Мене ми беше навистина забавно“, напиша Талија.
View this post on Instagram
И самиот Јовановски сподели фотографии од нејзиниот изглед и отворено го покажа неговото воодушевување поради фактот дека една толку голема ѕвезда носи негова креација.
„Вистинската дива Талија повторно носи парче од нашиот бренд. Овој златен корсет изгледа одлично на неа“, напиша Јовановски на Инстаграм.
