Еурофарм Пелистер домаќин на норвешкиот Колштад, по 18 години ЛШ повторно се игра во Битола
Денеска од 18.45 часот актуелниот македонски ракометен првак Еурофарм Пелистер ќе го има првиот натпревар од групата „А“ во Лигата на шампионите.
Противник на играчите на Александар Јовиќ во салата „Боро Чурлевски“ во Битола ќе биде норвешката екипа на Колштад.
Судии на денешниот меч ќе бидат Германците Роберт Шулце и Тобиас Тониес, додека ЕХФ делегат е Предраг Павичевиќ од Црна Гора.
– Емоцијата може да биде проблем, но може да ти даде и некоја посебна сила за да бидеш подобар и посмирен од противникот, да му зададеш удар и да се радуваш на крајот. Играме против супер екипа како Колштад. Норвежаните негуваат агресивен и динамичен ракомет. Гостуваат во Битола и ние ќе направиме сè да му ја отежнеме работата. Се работи за тим составен од повеќе норвешки репрезентативци, на чело со Сагосен. Тој, Род и двајцата голмани се лидери во тимот. Имаат искалена агресивна одбрана, за која со видео анализи треба добро да се спремиме да ги пробиеме. Ако сè оди по планот, имаме шанси да се надигруваме и на крајот да се радуваме. Мислам дека ова наше место ни е заслужено како шампиони на Македонија по осумнаесет години. Ние и фановите треба заедно добро да се поставиме и ќе бидеме светла точка која гордо ќе ја претстави Битола – вели пивотот на Еурофарм Пелистер, Жарко Пешевски.
ЕХФ Лига на шампиони
Група „А“
1. коло, двојки –
Денеска
18.45 часот Еурофарм Пелистер – Колштад
18.45 часот Келце – Алборг
Четврток
18.45 часот Пик Сегед – ПСЖ
18.45 часот ППД Загреб – Кил