Емери презадоволен по победата над Баерн: Бевме совршени
Фудбалерите на Виљареал продолжуваат со одличните игри во Лигата на шампионите остварувајќи триумф од 1:0 над Баерн Минхен во првиот четвртфинален натпревар во Лигата на шампионите. Ова е втора победа по ред за „жолтата подморница“ против поранешен европски шампион, откако во осминафиналето беше совладан Јувентус со 3:0 и тоа во Торино.
Човек на одлука беше Данжума кој единствениот гол го постигна во осмата минута, а Виљареал доминираше и во продолжение од натпреварот и му беше поништен гол поради офсајд, а тренерот Унаи Емери е презедаволен од играта на неговите фудбалерите.
– Најголемо задоволство ми причинува кога ќе видам дека навивачите се горди и сакаат тој момент да го поделат со играчите. Ги направивме среќни и јас сум горд поради тоа – рече Емери.
Вчерашниот натпревар за Емери беше 50. во кариерата на кој водел екипа во европско клупско натпреварување, а прв пат остварува две победи во нокаут фазата.
– Бевме совршени против Баерн. Постигнавме гол, ни беше поништен уште еден гол, а иако Баерн имаше свои шанси, ние имавме повеќе. Задоволен сум од тоа што го видов и посакувам вака да одиграме и во реваншот – додаде Емери.
Тренерот на Баерн Минхен, Јулијан Нагелсман призна дека неговите фудбалери заслужено загубија.
– Заслуживме да загубиме, едноставно не бевме добри. Во првото полувреме имавме многу малку шанси, а исто беше и во второто. Ја препуштивме контролата на играта на Виљареал бидејќи очајно посакувавме да постигнеме гол, но можевме да примиме уште два – призна Нагелсман.
ВИДЕО: „Предатор“ Карим Бензема, со хет-трик го покори европскиот шампион Челси!