На Универзитетската Клиника за хематологија во Скопје, матична докторка донираше хематопоетски матични клетки на пациент кој боледува од тешка малигна хематолошка болест, а трансплантацијата на матичните клетки е единствената терапевтска опција, информира Министерството за здравство.

Министерот Фатмир Меџити денеска ја посетил донорката на матични клетки, млада девојка, воедно и докторка, на која и се заблагодарил за храброста и несебичната посветеност да спаси туѓ живот.

-Нејзиниот чин на хуманост и солидарност е надеж, потсетувајќи нè на моќта на заедницата и љубезноста во моментите кога тоа е најпотребно. Им честитам и на колегите од Клиниката за хематологија кои ја практикуваат оваа современа метода во медицината со која еден човек има шанса за нов почеток, изјави министерот Меџити.

Директорката на клиниката за хематологија, д-р Ирина Пановска Ставридис изјави дека станува збор за редокот пример, донорот на матични клетки и пациетон кој треба да ги прими, не се во роднинска врска, ниту се познаваат, а нивните клетки се совпаѓаат.

– Денешниот чин на докторката е уште еден чекор до задоволството да се биде лекар и да се спасуваат животите на луѓето. Младата докторка која е донор на матичните клетки, во Македонскиот регистар на доброволни дарители на коскена срцевина при Институтот за имунологија и хумана генетикиа, се пријавила уште кога била студент по медицина, а минатиот месец беше идентификувана како евентуален донор. Не се двоумеше ниту миг, веднаш се согласи да му даде шана за живот на пациент кој не го познава, а боледува од Акутна леукемија, додаде д-р Пановска Ставридис.