Претседателот на Република Српска Милорад Додик изјави дека спроведувањето на 14-те приоритети од Мислењето на Европската комисија може да започне дури по усвојувањето на законот за Уставниот суд на БиХ, со кој „странските судии ќе бидат исфрлени од судот“.

Тој рече дека преговорите со партнерските партии на ниво на БиХ (пробосанската коалиција „Тројка“ и ХДЗ БиХ) за спроведување на реформите дефинирани во Мислењето на Европската комисија ќе бидат вратени во договорот од јуни оваа година, бидејќи, како што наведе, „само тој договор, што значи усвојување на законот за Уставниот суд на Босна и Херцеговина, може да биде упатство за натамошна работа“.

„Ова покажува кој е несериозен партнер. Во јуни се договоривме и потпишавме обврски до крајот на годината, а потоа донесовме некои закони. Ова на некој начин им одеше во прилог, но кога рековме дека ќе го ставиме на дневен ред законот за Уставен суд на Босна и Херцеговина во септември почнаа да го избегнуваат разговорот. Затоа, сега им велам – ќе се вратиме на договорот од јуни и на законот за Уставен суд, а потоа останатото“, изјави Додик.

Според него, „наместо некои од партнерите на ниво на Советот на министри да ја обвинуваат РС и да бараат изговори, за нив би било поодговорно и поконструктивно да слушаат што точно велат оние кои не сакаат БиХ да се приклучи на ЕУ“.

„Затоа, соберете храброст и исполнете ги нашите договори, да почнеме со Уставниот суд и Законот за Судот на Босна и Херцеговина. Без тоа нема одење напред, ниту со ЕУ ниту со РС“, истакна Додик.

Европската комисија вчера не го одобри почетокот на преговорите на БиХ за членство во ЕУ, барајќи од властите на БиХ да ги исполнат сите 14 приоритети од Мислењето на ЕК