Директорот на Бош: Ќе поминат децении до целосна електрификација на патниот сообраќај
Извршниот директор на германската инженерска групација Бош верува дека возилата со мотори со внатрешно согорување ќе бидат потребни уште најмалку 35 години пред да заврши електрификацијата на патниот транспорт.
Доколку целото глобално производство од 90 милиони возила се преправи веднаш, ќе бидат потребни 16 години за да се смени целата „флота“, вели Стефан Хартунг во написот објавен на веб-страницата на Пионер.
Бош е клучен снабдувач за автомобилскиот сектор. Но, во реалноста, моторите со внатрешно согорување ќе продолжат да се произведуваат и ќе треба да се заменат.
„Ќе биде потребно двојно повеќе време, најмалку 30 до 35 години, за да се електрифицираат сите автомобили ширум светот“, рече Хартунг.
Тој додаде дека, дополнително, одредени возила не можат да се електрифицираат и дека технологијата за внатрешно согорување ќе мора да продолжи да се произведува во Германија, пренесува Хина. Тој истакна и дека има потреба од иновации кои се уште не постојат, а како пример ги наведе земјоделските возила.