Десет граѓани се јавија кај Обвинителот за да му дадат сознанија за Онкологија
Десетина граѓани телефонски го контактирале надлежниот јавен обвинител со сознанија за да ја помогнат постапката околу Клиниката за онкологија, информираше јавното обвинителство. Претходно обвинителството ги охрабри сите граѓани кои имаат сонанија за овој предмет да ги пријават на надлежните органи. Обвинителството информира дека со предметот за Клиниката за онкологија се испитува евентуална повреда на највисокото уставно загарантирано право на здравствена заштита, па затоа се обезбедуваат дополнителни чекори за максимална транспарентност и отчетност на постапката. Тројца онколошки пациенти ќе имаат директен увид во сите докази и преземени дејствија и ќе мора тие сознанија да ги држат во тајност.
Врз основа на барањето на онколошките пациенти изнесено на средбата која се одржа на 7 септември, Обвинителството денеска ќе побара од неформалната организација преку која пациентите ги изнесуваат своите барања да избере тројца онколошки пациенти кои во текот на целата постапка ќе имаат директен увид во прибраните докази и во преземените дејствија. Пациентите ќе треба претходно да потпишат изјави со кои ќе се гарантира тајноста на постапката и на личните податоци во кои ќе имаат увид. Начинот на избор на пациентите е оставен на нивните претставници кои го изнесоа ваквото барање, информираат од ЈО.
Јавното обвинителство ги презема сите дејствија за обезбедување докази со цел проверка на наводите во овој предмет. Во таа насока, од самиот почеток е вклучен и лекарски и друг медицински персонал.