Дедото на Боки 13 бил прв директор на „Шутка”
Својата одбрана ќе ја дадам во два дела. Во наративен дел и со презентација. Долго размислував дали да дадам своја одбрана, бидејќи според искуството што го стекнав во овој суд, може да зборам до утре сабајле, онака како што е решено од сабајле така и ќе биде, рече на денешното судско рочиште Бојан Јовановски обвинет во аферата „Меѓународен сојуз”.
– Мојот татко кој исто така е обвинет во овој случај ништо не знаел што се случува и работи во „Меѓународен сојуз”. Мене обвинителката ме навреди. Ова обвинение за мене е девијантно алкохолизирано обвинение – рече Јовановски.
Претходно неговиот адвокат Сашо Дуковски рече дека дедото на Боки 13 бил партизан, работел во полиција и бил прв директор на истражниот затвор „Скопје“ каде тој моментално е затворен. Дуковски говорејќи за Миле Јовановски, таткото на Боки 13 кој исто така е обвинет во случајот „Меѓународен сојуз” и е обвинет за перење пари и за недозволено држење на оружје, рече дека не знае од каде испаднале три пиштоли во обвинителниот акт против Миле Јовановски.
– Обвинителката знае дека едниот е неисправен, а другиот е трофеј, сопственост на покојниот татко на Миле, кој работел во полиција – рече Дуковски.
Јовановски во предметот е првообвинет за кривичните дела перење пари и за измама, а Ременски е третообвинета за помагање во делото измама. Заменик-претседателката на невладината организација „Меѓународен сојуз“ – Скопје, Јасна Ерцеговиќ-Мандиќ, и асистентката на Боки, Христина Блажевска, пак, се обвинети за помагање во двете дела.
Неговиот татко, Миле Јовановски, се товари за помагање во перењето пари, како и неовластено изработување, држење, посредување и тргување со оружје.