Книгоиздателството „Темплум“, во рамките на едицијата „Катапулт“, го објави дебитантскиот роман „Вокабуларис“ од младата писателка Александра Мачковска, која се потпишува и како Ен Игма.

Во својот прв роман авторката ги вплетува световите на фантазијата и реалноста балансирајќи помеѓу необични автореференцијални експериментирања и динамична приказна. Една од темите во книгата „Вокабуларис“ е опасноста од неписменост, односно од изумирањето на културата. Со помош на едно авторско дело се прави напор да се зачуваат вредностите, да се подигне свеста, а „Вокабуларис“ е едно делче од „сложувалката“.

Александра Мачковска е родена и живее во Скопје. Дипломирала книжевност на катедрата за англиски јазик. Работела на преводи и статии на повеќе веб-страници од странство. „Вокабуларис“ е нејзин прв роман, оригинално напишан на англиски јазик. Таа веќе го пишува и својот втор роман „Ходник кон амнезија“.

(Текстот е објавен во „Културен печат“ број 54, во печатеното издание на „Слободен печат“ на 31 октомври – 1 ноември 2020)