УЕФА се соочува со проблеми пред стартот на Европското првенство бидејќи не успеа да ја убеди данската влада да дозволи влез на руските навивачи во нивната држава за натпреварот од групната фаза. Данска и Русија на 21 јуни во Копенхаген треба да играат меѓу себе во рамки на последното коло од групата Б.

Според данската влада, како превенција во борбата со пандемијата на коронавирусот, на граѓаните кои не се дел од Европската унија не им е дозволен влез во оваа држава, и тоа се однесува и за руските навивачи кои имаат влезници за натпреварот кој треба да се игра на 21 јуни.

Репрезентацијата на Русија, првите два натпревари против Белгија и Финска од групата Б ќе ги игра во Санкт Петербург, додека последниот натпревар ќе го игра на „Паркен“ стадионот во Копенхаген.
„Ве молиме веднаш да ја разгледате можноста за доѓање на нашите навивачи на натпреварот и да предложите механизам за решавање на оваа ситуација“, му напиша претседателот на руската федерација Александар Алајев на директорот на Евро 2020, Мартин Кален.