Далиќ: Шпанија не е среќна што мора да игра против нас во осминафиналето
Селекторот на Хрватска, Златко Далиќ изјави дека ја почитува репрезентацијата на Шпанија, но и дека се надева на пласман во четвртфиналето. Токму Хрватска и Шпанија утре (18 часот) ќе играат во осминафиналето на ЕП.
– Ги почитуваме сите, посебно нашиот следен противник, но и тие знаат дека и ние сме квалитетни и не се среќни што ќе играат против нас. Ќе бидеме максимално мотивирани и на крајот ќе видиме што ќе се случи. Нашата цел е пласман во четвртфиналето – изјави Далиќ.
Селекторот на „коцкестите“ нема да може да смета на Иван Перишиќ кој имаше позитивен тест на коронавирус непосредно пред тргнувањето за Копенхаген каде ќе се игра осминафиналната пресметка.
– Тоа беше шок за нас. Тешко е, но мораме да се адаптираме на новонастанатата ситуација. Иван ќе биде нашиот најголем навивач и се надевам дека ќе ни се приклучи за седум,осум дена. Не му е лесно, тој живее за ова, но… – додава Далиќ.
Победникот од дуелот помеѓу Хрватска и Шпанија во четвртфиналето ќе игра со подобриот од средбата помеѓу Франција и Швајцарија.