Жоан Лапорта кој годинава се врати на претседателската функција во Барселона (првиот мандат од 2003-2010 се смета за најуспешен во историјата на клубот), има чуден план како да ја спаси Барселона од големите долгови кои ја надминаа бројката од милијарда евра. Имено, Лапорта планира долгот да го намали со уште поголемо трошење.
Според „Мундо Депортиво“  Лапорта го направил првиот чекор и имал разговор со Нејмар на кој се зборувало за враќањето на Бразилецот на „Камп Ноу“.

Претседателот на Барселона е убеден дека овој трансфер не е невозможна мисија и дека шансите за такво нешто се зголемуваат секој ден бидејќи Нејмар одбива да потпише нов договор со ПСЖ. Актуелниот договор на Нејмар со ПСЖ му истекува идната година, а нов договор не е потпишан иако самиот фудбалер изјави дека нема дилеми и оти планира уште долго да остане во Париз.
Доколку сака да го врати Нејмар уште ова лето, Лапорта ќе мора да најде најмалку 100 милиони евра кои би ги барал ПСЖ како обесштетување или да се откаже од Осман Дембеле но прашање е дали самиот фудбалер сака да си замине од „Камп Ноу“.

Лапорта во исто време е во преговори со инвеститор од САД за позајмица вредна 500 милиони евра кои клубот би ги искористил да ги намали долговите но и да го финансира новиот договор со Лионел Меси.