Чешкиот премиер Андреј Бабиш по состанокот на кабинетот во понеделник изјави дека купил глобус за подобро да се запознае со локацијата на Гренланд, остров околу кој се засилија геополитичките тензии, објавуваат странските медиуми.

„Прекрасен глобус, голем, за 620 евра, за да се види точно каде е Гренланд. Ракетата „Орешник“ би летала од Русија до Белата куќа за 26 минути, а во единаесеттата минута би бил веднаш над Гренланд. Значи, аргументите на претседателот Трамп за Кина и Русија се релевантни. Едноставно мора да се согласиме. Сите повици или декларации се бесмислени“, изјавил Бабиш.

На прашањето на новинарите дали Чешка ќе се придружи на заедничката изјава на европските земји во која се предупредува на воведување американски царини, Бабиш одговори дека тоа не може да го каже.

„Велиме дека во рамките на НАТО, САД се лидер. Овие конфликти се контрапродуктивни и мора да постигнеме договор“.

Бабиш додаде дека со купениот глобус му станало појасно „зошто островот е геостратешки пресечна точка“.

Изјавите на Бабиш беа проследени со иронија и со симпатии. Премиерот, кој е познат по своите директни настапи, во овој случај визуелно ја претстави сопствената позиција – глобусот како алатка за разбирање на геополитиката.

Во Прага коментарите велат дека „премиерот успеал да ја претвори топката на светот во политички аргумент“.

Трамп пред четири дена објави дека почнувајќи од 1 февруари ќе ги зголеми увозните тарифи за осум земји кои се спротивставуваат на преземањето на Гренланд од страна на САД.