Челси фаворит за Хаверц, но 100 милиони евра се премногу!
Лондонските „сини“ и натаму покажуваат интерес за обезбедување на услугите на еден од најдобрите играчи на Баер Леверкузен.
Челси (кој претходно ги ангажираше Тимо Вернер и Хаким Зијеш) според британските медиуми е фаворит за потписот на Каи Хаверц, но сумата која што ја бараат Германците за играчот од 90 милиони фунти (100 милиони евра) е преголема. За фудбалерот во трката се наоѓаат уште Реал Мадрид, Барселона и Баерн Минхен.
Хаверц сака да го напушти бундеслигашот ова лето и неговиот клуб е подготвен да го ослободи, иако има уште две години од важечкиот договор, а воедно не успеаја да се квалификуваат за следната сезона во Лигата на шампионите.
Баер го освои петтото место кое води во групите на Лигата на Европа и Хаверц може да продолжи со екипата да игра во тоа натпреварување.
Но, му се нуди и шанса да игра во Лигата на шампионите со Челси кој е третопласиран моментно во Премиер лигата, иако и натаму го нема обезбедено настапот во европскиот крем на четири кола до крајот на сезоната.
21-годишниот играч во Бундеслигата минатата сезона за Леверкузен запиша 12 голови и шест асистенции, а според „Трансфермаркт“ вреди 81 милион евра.