Британската влада од 3. до 31. август ја спроведува програмата „Јади надвор за да помогнеш“ (Eat out to help out )  со која субвенционира 50 отсто од износот на сметката за да ги поттикне граѓаните да јадат надвор и да ги спасат рестораните од затворање.

Се работи за програма внатре во проектот Коронавирус (ковид-19) Бизнис поддршка (Business support).

Субвенционирањето на сметките важи во понеделник, вторник и среда, односно деновите кога прометот во рестораните е помал. Нема ограничување на бројот на попусти, единствен услов е угостителскиот објект да е регистриран во проектот „Јади надвор за да помогнеш“.

Попустот се однесува на храна или безалкохолни пијалоци. Се субвенционира максимално до 10 фунти по гостин.

Се напоменува дека попустот не важи за алкохолни пијалоци и за услуги на вработените на ресторанот.

Попустот функционира така што гостинот веднаш добива намалена сметка, а потоа рестораните надомест за разликата ја бараат од владата.