Македонската репрезентација е поразена од Португалија со 25:29 во осминафиналето на Светското првенство кое се игра во Скопје.  Сепак, селекторот Данило Брестовац е задоволен од прикажаната игра на неговите избраници бидејќи го дадоа максимумот.

– Сакавме да играме со Португалија. Ја избравме, мислев дека можеме против нив. Видов дека ќе биде тешко против Германија и против Исланд. Имавме еден гол предност, но не успеавме да славиме на крајот. Може да се забележи дека за нас е полесно кога играме против европски репрезентации.

Но, ни недостига физичка и техничка подготовка, а имаме уште работа за да произведеме ракометари за А-репрезентацијата. Задоволен сум од играчите, сепак за разлика од нас, португалските ракометари редовно играат во нивните клубови и имаат поголемо искуство.

Треба да бидеме среќни ако од оваа генерација излезе уште некој потенцијал за А-селекцијата, покрај Серафимов, Костески и Кизиќ. Знам дека постои разочарување, но ако сме искрени, ние сме селекција од Б-дивизија и треба да тежнееме што побрзо да дојдеме до А дивизија– изјави Брестовац.