Поради коронавирусот ситуацијата во Белгија е сè потешка, гледачите нема да бидат присутни на натпреварите од белгискиот фудбалски шампионат во наредниот месец, одлучи белгиската Влада.

Тоа не е сè, има сè поголем број потврдени случаи на коронавирус кај фудбалерите, поради што се одложуваат натпреварите од елитниот ранг.

Така, три натпревари од 10 коло се одложени, Еупен-Мехелен, Шарлероа на македонскиот репрезентативец Ѓоко Зајков и Беверен, како и дуелот Серкл Бриж-Мускрон кои своите мечеви ќе ги играат во нов термин.

Меди Бајат, претседателот на Фудбалската асоцијација на Белгија, зборуваше за тешкиот удар по најавата на советничкиот одбор дека дуелите ќе се играат без навивачи.

– Тоа е тежок удар за нашиот сектор на активност, но во исто време ситуацијата е сериозна и наша одговорност е во овие моменти да бидеме солидарни со нашата влада и донесените одлуки. Пред сè, мора да ги поддржиме и да се надеваме дека за еден месец, ситуацијата ќе ни овозможи да ги вратиме навивачите на стадионите – рече Бајат, кој воедно е и спортски директор на Шарлероа.

А покрај фудбалските, и други спортски настани во Белгија ќе се организираат зад затворени врати овој викенд.