Белгија бележи рекорден број на новозаразени со Ковид-19 во последните пет месеци
Белгија регистрира во просек 2.114 нови случаи на Ковид-19 дневно, највисок број во последните пет месеци, јави дописничката на МИА од Брисел.
Здравствените власти во Белгија информираат дека последен пат е постигнат толкава стапка на трети мај годинава кога многу помал број од населението беше покриено со вакцина.
На ниво на цела земја ова зголемување изнесува 23,5 отсто во рок од една недела, помеѓу 5 и 11 октомври.
Властите не вклучуваат аларм за сега и не станува збор за нови рестриктивни мерки со оглед на тоа дека бројот на новозаразени не се одразува врз болниците, иако остануваат внимателни и чекаат да видат каква ќе биде ситуацијата во наредните осум дена.
Белгија е една од земјите со највисока стапка на вакцинирани на државно ниво во Европа, наредните денови и состојбата во болниците ќе биде показател за ефикасноста на процесот на имунизација, односно дали новозаразените кои се вакцинирани нема да развијат тешки форми на Ковид-19, или дали невакцинираните ризикуваат тежок облик на болеста поради делта сојот.
Од овој месец во сила стапува и Ковид сертификат за влез на јавни собири, настани и угостителски објекти во повеќе региони во државата.
Извор: МИА