Новиот шестосед ски-лифт којшто се гради на Попова Шапка ќе биде во употреба за оваа зимска и скијачка сезона, вели министерот за економија Крешник Бектеши кој денеска беше на увид во градежните работи на патот до ски-центарот.

Според Бектеши, техничкиот прием на новиот ски-лифт ќе биде за три до четири недели.

– Ќе има теститање на ски-лифтот и ќе се овозможи на ЕЛЕМ Турс да го стави во функција пред да почне зимската сезона кога Шапка се посетува најмногу. Нема да застанеме тука, наша цел е да создадеме регионален центар којшто нема да придонесе само во локалниот, туку и во регионалниот развој и каде ќе се креираат нови работни места – рече Бектеши.

Анализите коишто се прават, наведе, ќе дадат насоки како ќе се развива во иднина Попова Шапка, а одлуката ќе биде донесена наредната година.

– За таа цел кај ЕЛЕМ Турс се спроведува длабинска финансиска анализа, сега ја чекаме и физибилити студијата и тие документи коишто се многу прецизни ќе ни дадат насока каде треба да се движиме. Наредната година ќе се знае што ќе се прави воопшто со Попова Шапка, со ски-лифтовите, хотели и во целост што со ЕЛЕМ Турс – истакна Бектеши.

Тој посочи дека Министерството ќе даде помош на општина Тетово околу останатите активности за подобрување на инфраструктурните услови на Попова Шапка и викенд населбата.