Необична заедничка случка имале Владо Јаневски и Игор Џамбазов во Кочани, а на крајот завршила со бегање. Џамбазов во детали и во негов стил ја раскажа случката.

„Се јавува еден, го организира ’Мис на Кочани‘. Ми се јавува на мене и вели: ’Сакаме ти и Владо Јаневски да бидете во жири. Ќе свири некој бенд‘. Доаѓаме и имаше две бараки, службени, и јас му велам: ’Да им земеме податоци на девојките, име и презиме, година на раѓање, висина, гради, омилен глумец, боја‘. Овој ме гледа, ми вика: ’Срцка, не се пријави ни една“, раскажа Игор Џамбазов за радио Кочани.

Кога актерот го прашал организаторот што ќе прават, тој му одговорил: „Ќе се качиш на сцената, и трите најубави од публиката што ќе ги видиш, ќе ги кажеме кои се. Му реков ’важи‘ и на Владо му реков: ’Пеј две песни и те чекам во колата надвор‘. Пееше Владо две песни, имаше тој една девојка, нè возеше, куршум за еден и пол час во Скопје. Избегавме! Мис на Кочани, ни една пријавена“, се присети Игор Џамбазов.

– Долготрајноста на мојата кариера не е моја заслуга, за тоа се „виновни“ оние што ги сакаат моите песни и доаѓаат на моите концерти, тие направиле место во своите срца за таму да живеат моите ноти и зборови што им ги давам сите овие години. Ме радува што секоја година, покрај нив, на концерти забележувам нови млади лица што ги знаат сите мои текстови наизуст, и тие се мојот музички „подмладок‘“ што им вдахнува нов живот на моите песни и го одржува пламенот на мојата кариера – рече Владо Јаневски во едно интервју за „Слободен печат“.