Беџети: Нема потреба „огнените“ да се двојат и да формираат нов политички субјект, така се расцепкува албанското бирачко тело
По предлогот на Изет Меџити, „огнените“ да расчистат со ДУИ и да формираат свое движење или партија, градоначалникот на општина Сарај, Блерим Беџети во изјава за Журнал вели дека тие се фракција на ДУИ и се различни, но нема потреба од формирање нов политички субјект, бидејќи така се расцепка албанското бирачко тело, а проблемите треба да ги решаваат внатре во партијата.
-Има разлики меѓу нас. Ние сме фракција во рамки на ДУИ и треба разликите да ги решаваме внатре во ДУИ. Не затоа што Блерим Беџети, Муса Џафери и Невзат Бејта се против формирање на нов политички субјект, туку затоа што нема потреба од тоа, бидејќи така се распарчува албанскиот електорат – потенцира Беџети.
Зборувајќи за соработката со другите опозициски партии, меѓу кои и ВМРО-ДПМНЕ, Беџети негира такво нешто.
Не сме имале соработка затоа што сме фракција. Се надеваме дека нашите аргументи ќе ги решиме преку дебата во рамките на партијата – додава тој.
Коментирајќи ја политичката состојба во земјава и процесот на уставни измени, Беџети вели дека тие се на ист став како сите во ДУИ и дека овој процес мора да заврши што е можно поскоро.
„Мораме да внимаваме да не ги охрабруваме антиевропските сили, а ние во ДУИ сме на ставот дека ова прашање мора да се реши што е можно поскоро за процесот кон ЕУ да се движи што е можно побрзо“, објаснува Беџети за Журнал.
Раскол меѓу Меџити и Беџети како да продолжат „огнените“: Фракција или партија, прашање е сега!
Според информации на „Слободен печат“ од двата табора, фракционерите идната недела треба да се состанат и да пресечат кој пат ќе го фатат, од што ќе зависи и дали ќе следи нов раскол помеѓу интегративците.
Како аргументи дека се во право, и приврзаниците за нов политички субјект и приврзаниците на фракционерското дејствување во ДУИ се повикуваат на базата, односно дека тоа го бара партиската структура. Според информациите, зад Беџети и зад таборот да остане фракцијата се Муса Џафери и Невзат Бејта, додека поддрша на Меџити за основање партија има од чаирскиот градоначалник Висар Ганиу.