Барние: Преговорите со Лондон почнуваат на втори март
Европската Унија и Велика Британија во понеденик, 2 март, во Брисел ќе ги започнат разговорите за идните односи, изјави главниот преговарач на ЕУ за Брегзит, Мишел Барние.
Тој на пресконференција за новинарите во Брисел рече дека првиот круг на разговори ќе трае до четврток, 5 март. Вториот круг на разговори ќе се одржи подоцна истиот месец во Лондон.
Според зборовите на Барние, ЕУ сака да започне разговори на десет паралелни групи за трговија, безбедност надворешна политика и други теми.
– Нема да ги заклучуваме преговорите по секоја цена. Не можеме да направиме се во краток период, но ќе направиме колкушто можеме – нагласи Барние.
Додаде дека преговорите ќе бидат комплексни и многу тешки, а планирано е истите да завршат до крајот на годината.