Сенегалскиот фудбалер и напаѓач на Баерн Минхен, Садио Мане е суспендиран од неговиот тим за натпреварот од Бундеслигата против Хофенхајм во сабота, соопшти денеска баварскиот клуб.

Тој беше казнет поради расправијата со соиграчот Лерој Сане во вторникот по натпреварот од Лигата на шампионите против Манчестер сити.

Баерн го суспендираше Мане и го казни „за недолично однесување по натпреварот на Баерн од Лигата на шампионите во Манчестер“, соопшти клубот.

Мане ќе му биде на располагање на тренерот Тухел за реваншот од четвртфиналето на Лигата на шампионите против Сити во Минхен во среда.

Германските медиуми објавија дека тепачката се случила во близина на соблекувалната по натпреварот, кога Мане бил бесен поради потегот на Сане. Мане потоа го удри Сане со тупаница, поради што неговата усна искрвари.

Двајцата играчи се појавија на денешниот тренинг на Баварците, а за одлуката за суспензија го известија спортскиот директор Хасан Салихамиџиќ и претседателот на управниот одбор, Оливер Кан. Мане во Баерн пристигна во летото 2022 година од Ливерпул за сума од 32 милиони евра.