Австрија денеска постави израелско знаме на официјалните згради „во знак на солидарност поради нападите на израелската територија од Појасот Газа од страна на палестински Хамас и други терористички групи”.

– Најсилно ги осудувам нападите врз Израел од Појасот Газа, изјави австрискиот канцелар Себастијан Курц, пренесе Бета.

– Израел треба да се брани од овие напади. Како израз на нашата солидарност, го поставивме израелското знаме на зградата на Владата и Министерството за надворешни работи, додаде тој.

Австрискиот министер за надворешни работи Александар Шаленберг рече дека „ништо не го оправдува” фактот дека „Хамас и другите терористички групи” досега истрелале повеќе од илјада ракети од Појасот Газа кон Израел и истакна дека Австрија силно ја поддржува безбедноста на Израел.

Австриското обвинителство, исто така, отвори истрага по антисемитските изјави за време на демонстрациите за поддршка на Палестинците во Виена во средата.