Поради исклучување на високата печка, 2.800 работници се без работа во Велс
Индиската компанија Тата Стил го одби барањето на синдикатот на британската челичарница Порт Талбот да ги задржи високите печки во таа фабрика, што ќе доведе до отпуштање на дури 2.800 работници.
Првата висока печка во таа железарница во Јужен Велс треба да биде затворена на крајот на јуни, а втората во септември, објави Гардијан. Тата Стил ќе им понуди на работниците програма за доброволно отпуштање на 15 мај.
Во јануари компанијата во индиска сопственост објави затворање на две од четирите активни високи печки во Велика Британија, што е тежок удар за фабриката за челик во Порт Талбот, која е доминантен деловен субјект во тој град и неговата околина.
„Тата Стил“ планира да ги замени високите печки, од кои се добива челик со топење на железна руда, со електрични лачни печки. Таа компанија има намера да нарача опрема за нови печки до септември. Електрификацијата на процесот на производство на челик е многу почиста во однос на екологијата, бидејќи не се потпира на хемиска реакција која создава јаглерод диоксид. Ова ќе претставува и голема инвестиција од 1,25 милијарди фунти, но воведувањето на понова технологија ќе бара и многу помалку работници, пренесува Танјуг.