Авиокомпаниите летаат кон рекордни профити за 2023 година
Авиокомпаниите ширум светот веројатно ќе забележат рекорден профит оваа година. Меѓународната асоцијација за воздушен транспорт (ИАТА) ја удвои својата прогноза за профитот на секторот за 2023 година на речиси 10 милијарди долари, беше откриено на годишниот состанок на организацијата во Истанбул.
Податоците ги цитира британски „Гардијан“, прнесува БГНЕС. Во меѓувреме, главниот извршен директор на здружението Вили Волш ги отфрли обвинувањата дека цените на билетите се превисоки, велејќи дека профитот на компаниите е „тенок“. Според него, причина за високите цени се огромните трошоци што ги наметнуваат изведувачите.
Откако изгуби 183 милијарди долари за време на пандемијата, секторот се радува на „профитабилна, безбедна, ефикасна и одржлива иднина“, вели Волш. ИАТА очекува годишен приход од 803 милијарди долари оваа година и нето добивка од 9,8 милијарди долари – двојно повеќе од декемвриските прогнози. Глобалниот број на патници се очекува да достигне 4,35 милијарди, околу 96 отсто од последните нивоа пред пандемијата во 2019 година.
Растот во голема мера е поттикнат од отворањето на Кина, но има зголемена побарувачка ширум светот. Високите цени на горивата и инфлацијата се одговорни за растот на цените, соопшти ИАТА. Според нив, по одбивањето на инфлацијата, цените во моментов се на ниво од 2019. Здружението проценува дека просечната добивка по патник е само 2,25 долари.
„Со тие пари, не можете да купите ни билет за метро во Њујорк. Тоа не е одржливо ниво на профит. Но, имајќи предвид дека изгубивме 76 долари по патник во 2020 година, стапката на закрепнување е солидна“, коментира Волс.
И оваа година во голема мера се очекува да биде помирна по хистеријата од 2022 година со недостиг на персонал, изгубен багаж, огромни доцнења, а потоа и штрајкови.